ИИМге 370 жаңы кызматтык автоунаа тапшырылды
Министрлер Кабинетинин төрагасы Адылбек Касымалиев Ички иштер министрлигине жаңы кызматтык автоунааларды тапшыруу аземине катышты. Бул тууралуу Өкмөттүн Басма сөз кызматынан билдиришти.
Маалыматка ылайык, ИИМге заманбап санариптик технологиялар менен жабдылган 370 автоунаа берилди.
Иш-чарада сүйлөгөн Адылбек Касымалиев коомдук коопсуздукту жана мыйзамдуулукту камсыз кылуу мамлекеттин туруктуу өнүгүүсүнүн негизги шарттарынын бири экенин белгиледи.
Анын айтымында, акыркы жылдары өлкөдө мамлекеттик органдардын материалдык-техникалык базасын чыңдоо боюнча масштабдуу иштер жүргүзүлүүдө. Бул аралыкта ИИМ системасы үчүн 280 жаңы имарат курулуп, 300гө жакын объект реконструкцияланган.
Министрлер кабинетинин төрагасы “Коопсуз өлкө” долбоорунун алкагында республика боюнча 10 миңге жакын видеокөзөмөл камерасы орнотулганын билдирди. 2026-жылдын аягына чейин алардын санын 20 миңге жеткирүү пландалууда.
Ошондой эле ал заманбап техника кесипкөй жана принципиалдуу кадрлардын колунда гана натыйжалуу иштей турганын белгилеп, милиция кызматкерлерин мыйзамдуулукту так сактоого чакырды.
Иш-чаранын соңунда Адылбек Касымалиев укук коргоо органдарынын кызматкерлерине кызматтагы берилгендиги үчүн ыраазычылык билдирди.
