Кыргызстан менен Түркия киберкылмыштуулукка каршы кызматташууну кеңейтет

Кыргызстандын жана Түркиянын өкүлдөрү Анкарада жолугуп, коопсуздук, укук коргоо органдарынын кызматташуусу жана кыргызстандык милиция кызматкерлерин окутуу маселелерин талкуулашты. Бул тууралуу ИИМдин басма сөз кызматынан билдиришти.

Анкара шаарында Кыргызстандын Түркиядагы элчиси Руслан Казакбаев жана Ички иштер министрлигинин Түркиядагы өкүлү Манас Аманбаев Түркиянын Коопсуздук башкы башкармалыгынын башчысы Али Фидан менен жолугушту.

Жолугушууда тараптар эки өлкөнүн коопсуздукту камсыздоо, жарандардын укуктарын жана мыйзамдуу кызыкчылыктарын коргоо, ошондой эле укук коргоо органдарынын кызматташтыгын өнүктүрүү маселелерин талкуулашты.

Мындан тышкары, кыргызстандык милиция кызматкерлерин Түркияда окутууну улантуу жана киберкылмыштуулукка, экстремизмге, баңгизаттардын мыйзамсыз жүгүртүлүшүнө каршы күрөшүү, ошондой эле коомдук тартипти камсыздоо боюнча биргелешкен окуу программаларын кеңейтүү тууралуу макулдашылды.