УКМКнын мурдагы орун басары Уранбек Шадыбеков 2 айга камакка алынды
Бишкектин Биринчи май райондук соту УКМКнын мурдагы орун басары Уранбек Шадыбековду 2-сентябрга чейин камакка алуу чечимин чыгарды. Бул тууралуу аталган райондук соттон билдиришти.
Маалыматка таянсак, ага Кылмыш-жаза кодексинин 336-беренесинин 2-бөлүгү (Уюшкан топтун же кылмыштуу коомдоштуктун кызыкчылыгы үчүн жасалган же оор кесепеттерге алып келген коррупция) боюнча айып тагылган. Эске салсак, У.Шадыбеков бир күн мурда кармалган.
Уранбек Шадыбеков 2026-жылдын февраль айында атайын кызматтагы кеңири кадрдык өзгөрүүлөрдөн кийин УКМК төрагасынын орун басары жана киберкоопсуздукту камсыздоо боюнча координациялык борбордун жетекчиси болуп дайындалган. Буга чейин ал улуттук коопсуздук органдарында эмгектенип келген. 8-июнда президенттин жарлыгы менен ээлеген кызматынан бошотулган.
