Айыл чарба министрлиги дыйкандарды күздүк буудай эгүүгө чакырууда
Суу ресурстары, айыл чарба жана кайра иштетүү өнөр жайы министрлиги дыйкандарды күздүк буудай эгүүгө чакырат. Ведомствонун маалыматына караганда, күздүк буудай — эмгекти сарамжалдуу пайдалануунун, мол түшүм жана туруктуу киреше алуунун ишенимдүү жолу болуп саналат.
Күздүк буудайдын артыкчылыктарынын бири — жогорку түшүмдүүлүк. Ал жаздык буудайга салыштырмалуу 20%га чейин көбүрөөк түшүм берет. Мындан тышкары, ал эрте бышат, бул талааны эрте бошотуп, экинчи түшүм алуу мүмкүнчүлүгүн түзөт.
Күзүндө топуракта ным көбүрөөк болгондуктан, күздүк буудай кургакчылыкка туруктуу жана азыктандыруучу заттарды жакшы топтойт. Ошондой эле күзүндө отоо чөптөр азыраак чыгып, дыйкандардын эмгегин жеңилдетет.
Министрлик белгилегендей, күздүк себүү дыйкандарга жазгы иштерди жеңилдетүүгө жана убакытты туура пайдаланууга жардам берет.
