Кытай инвесторлору Жыргалаң курортун курууга кызыкдар
Кытайдын буга чейин ири мейманканаларды курган инвесторлору "Ала-Тоо Резорт" курортун курууга кызыкдар экенин "Ала-Тоо Резорт" ишканасы маалымдады.
Маалыматта коңшу мамлекеттен келген курулуш компаниялардын өкүлдөрү МинКаб чечимдерин даярдоо боюнча башкармалыктын башчысы Азамат Кадыралиев жана “Ала-Тоо Резорт” мамлекеттик ишканасынын директору Жаркынбек Максүтов менен биргеликте курорт курула турган аймакты жеринен көрүштү.
Ушул тапта Садыр Жапаровдун демилгеси, мамлекеттин колдоосу менен курулушу башталган бул ири курортко барчу жолдордун, ошондой эле асма аркан жолдун, таза суу объектилеринин курулушу да кызуу жүрүп жатат. Инвесторлор Жыргалаң шаарчасы курулуп жаткан жер тилкелерин алуу үчүн аукциондун экинчи этабына катышуу ниетин билдиришкен.
Эске салсак Ысык-Көл облусунун Ак-Суу районундагы Хан-Теңири айыл аймагына курулуп жаткан “Ала-Тоо Резорт” ири курорттук зонанын алгачкы этабы июль айында өткөн. Анда курула турган обьектилердин жер тилкелерин 14 лот менен жергиликтүү инвесторлор уткан.
Эми аукциондун экинчи этабы жакынкы күндөрү жарыяланып, дагы 35 лот аукционго коюлат.
