Мэрия шаардын арык системасынын санарип картасын түздү
Бишкек мэриясы борбордун арык системасынын санарип картасын түздү. Анда алмаштырууну талап кылган участоктор жана жаңы системаны киргизүүгө зарыл болгон жерлер көрсөтүлгөнүн вице-мэр Рамиз Алиев Бишкек шаардык кеңешинин муниципалдык менчик, жер маселелери, шаар куруу жана архитектура боюнча туруктуу комиссиясынын жыйынында билдирди.
Буга чейин "Ынтымак" фракциясынын депутаты Казыбек Эргешов борбордун ирригациялык системасынын абалы жөнүндө маселе көтөргөн. Ал ирригацияга 600 млн сом бөлүнгөнүнө карабастан, иштер дээрлик башталбаганын айткан.
Вице-мэрдин айтымында, учурда 20 километрден ашык сугат түтүктөрү жана 5 километрге жакын ирригация тартылган. Ал объектилердин так жайгашкан жерлерин, фото жана видеолорду кошо берүүгө убада кылды.
Депутаттын шаардагы ирригациялык тармактын жалпы узундугу тууралуу суроосуна жооп берип, Алиев анын көлөмү 410 километр экенин, анын 90 километрин магистралдык линиялар түзөрүн айтты. Эсептик мезгил ичинде 20 километрге жакын иштер аткарылган.
Р.Алиевдин маалыматына караганда, ирригациялык системанын 100 километрге жакын бөлүгү оңдоону талап кылат. Анын айтымында, мэрия Бишкектин арык системасынын санарип картасын түзүп, анда бардык каналдардын жайгашуусу көрсөтүлгөн. Картада алмаштырууга муктаж участоктор жана жаңы система тартылышы керек болгон аймактар белгиленип, ар кандай түстөр менен категорияларга бөлүнгөн.
Өз кезегинде К.Эргешов жаан-чачын жана кар эриген маалда иштебеген ирригация системасынын айынан шаарда суу каптоо учурлары көп болорун айтты. Депутат жарандардан көптөгөн кайрылуулар түшүп жатканын белгилеп, жаандан кийин суу үйлөрдүн ичине чейин кирген учурларды мисал келтирди.
