Жер казынасын пайдалануу лицензияларын кармоо төлөмдөрүнүн жаңы тартиби бекитилди
Министрлер кабинети лицензияларды кармоо боюнча төлөмдөрдү эсептөө, төлөө жана карыздарды өндүрүү тартибинин жаңы редакциясын бекитти.
МинКаб Кыргыз Республикасынын жер казынасын пайдалануу боюнча лицензияларды кармоо үчүн төлөмдөрдү эсептөө, төлөө жана карыздарды өндүрүү тартибинин жаңы редакциясын бекитти.
Бул документ КРнын салык эмес кирешелер жөнүндө кодексин ишке ашыруу максатында кабыл алынган жана 2022-жылдын 12-августундагы № 449 токтомго өзгөртүүлөрдү киргизет. Эски тартип өз күчүн жоготуп, анын ордуна № 758 токтомго тиркелген жаңы редакция күчүнө кирет.
Жаңы редакцияда каралган негизги өзгөртүүлөр:
- Төлөөчү, база жана лицензия кармоо төлөмүнүн объектиси түшүнүктөрүн тактоо;
- Төлөм суммасын эсептөө, кайра эсептөө жана жер казынасын пайдаланууга ыйгарым укуктуу орган менен макулдашуу механизмининин деталдуу аныкталышы;
- Лицензияларды калыбына келтирүү, убактылуу токтотуу, трансформациялоо жана токтотуу, ошондой эле форс-мажор шарттарындагы аракеттердин тартиби;
- Лицензиялык аянттын жайгашышына жараша төлөмдөрдү жергиликтүү жана республикалык бюджеттерге бөлүштүрүү эрежелери;
- Салык органдары менен жер казынасын пайдаланууга ыйгарым укуктуу орган ортосунда маалымат алмашуу жана карыздарды администрациялоо тартиби, анын ичинде төлөнбөгөн учурда лицензияларды токтотуу жана жокко чыгаруу.
Мындан тышкары, STI-176 жана STI-177 формаларын камтыган эсептерди жана отчетторду салык төлөөчү кабинети аркылуу тапшыруу тартиби, ошондой эле жер казынасын пайдаланган субъекттердин маалыматтарды кабарлоо жана жаңыртуу милдеттери өзгөчө белгиленген.
