ЕАЭБ ичиндеги эсептешүүлөрдө улуттук валюталар үлүшү 93%га жетти
ЕАЭБнин Өкмөттөр аралык кеңешинин кеңейтилген жыйынында Россиянын премьер-министри Михаил Мишустин биримдик ичиндеги эсептешүүлөрдө улуттук валюталардын үлүшү 93%га жеткенин билдирди.
"Биримдик ичиндеги эсептешүүлөрдө улуттук валюталардын үлүшү 93%га жетти. Ал эми россиялык бизнес менен "бештикке" кирген башка өлкөлөрдүн ишкерлеринин ортосундагы тышкы соода келишимдеринде бул көрсөткүч 98%дан ашты", — деди ал.
Анын айтымында, 2025-жылдагы негизги көрсөткүчтөр боюнча ЕАЭБнин алдын ала жыйынтыктары жакшы болуп жатат. Союзга кирбеген мамлекеттер менен соода-экономикалык алакаларды кеңейтүү боюнча да кызыгуу бар.
"Евразия аймагында транспорттук байланыштарды чыңдоону улантып жатабыз. Бул жерде заманбап чечимдерди, биринчи кезекте логистикалык инфраструктураны жаңылоо жана транспорт коридорлорун санариптештирүү боюнча ыкмаларды тездетип киргизүү абдан маанилүү. Бул иштеп жаткан багыттардын өткөрүү жөндөмүн жогорулатып, жүктөрдү ташуу көлөмүн көбөйтүүгө мүмкүндүк берет", — деп кошумчалады Михаил Мишустин.
