Бишкекте БА менен АКШнын экономикалык кызматташтыгын талкуулаган форум өтөт

12-декабрда Бишкекте 2026-жылдын 4–5-февралында өтө турган Экинчи "В5+1" Форумун даярдоого арналган брифинг болуп өттү. Ага Атайын жана Ыйгарым укуктуу Элчилер жана дипломатиялык корпустун өкүлдөрү катышты. Бул тууралуу Экономика жана коммерция министрлигинен билдиришти.

Маалыматка ылайык, форум 2025-жылдын 6-ноябрында Вашингтондо өткөн "С5+1" саммитинде жетишилген макулдашууларды ишке ашыруу максатында уюштурулууда. Ал Борбор Азия өлкөлөрү менен АКШнын ортосундагы экономикалык кызматташтыкты чыңдоого багытталган.

Тышкы иштер министрлиги "В5+1" демилгеси аймактык интеграцияны бекемдөөгө жана инвестициялык жагымдуулукту жогорулатууга өбөлгө түзөрүн белгиледи. Ал эми Экономика жана коммерция министрлиги форумдун алкагында айыл чарба, IT жана электрондук коммерция, транспорт жана логистика, туризм, банк сектору жана критикалык минералдар негизги багыттар болорун билдирди.

Форумдун Бишкекте өтүшү мамлекеттик органдар менен бизнес-коомчулугунун ортосундагы өз ара аракеттенүүнү күчөтүүгө багытталган.