11 айдын жыйынтыгы менен 275 млрд сом салык жыйналды

КРда жүргүзүлүп жаткан салык реформаларынын негизги максаты жаңы салык же кошумча ставкаларды киргизүү эмес, көмүскөдө иштеп келген ишкерлерди ачык иш алып барууга тартуу жана салык базасын кеңейтүү болуп саналат.

Бул тууралуу Салык кызматынын төрагасынын орун басары Кубанычбек Ысабеков “Биринчи радиого” берген маегинде билдирди.

Анын айтымында, 2025-жылга карата салык жыйноо планы 268 млрд сом деп белгиленген. Бирок жүргүзүлүп жаткан реформалардын жана натыйжалуу иштердин эсебинен бул көрсөткүч жыл аягына чейин 303 млрд сомго чейин жетет деген үмүт бар. Жылдын 11 айынын жыйынтыгы менен эле 275 млрд сом салык жыйналып, белгиленген план ашыгы менен аткарылды.

Кубанычбек Ысабеков белгилегендей, учурда жаңы салык түрлөрү киргизилген жок. Тескерисинче, ишкерлерди колдоо максатында бир катар жеңилдиктер берилип, айрым салык ставкалары төмөндөтүлдү. Мисалы, зергерчилик тармагында мурда сатуудан алынуучу салык 4 пайызды түзсө, ал 2 пайызга чейин кыскартылды.

Эске сала кетсек, Кыргыз Республикасынын Президенти Садыр Жапаров «Экономиканын айрым тармактарын колдоо боюнча чаралар жөнүндө» Жарлыкка кол койгон. Бул документ зергерчилик жана тигүү өнөр жайын комплекстүү өнүктүрүүгө, ошондой эле чакан жана орто бизнести колдоого багытталган.