Чаткал 2035: Экотуризм жана жашыл энергетика үчүн жаңы мүмкүнчүлүктөр

Бүгүн, 15-декабрда Бишкек шаарында "ЭКО-Чаткал 2035" улуттук форумы болуп өттү. Иш-чарага Кыргыз Республикасынын экономика жана коммерция министринин орун басары Медербек Туманов катышты. Форум Чаткал районун туруктуу өнүктүрүү, климаттык каржылоо механизмдерин колдонуу жана улуттук лейбл-пилотту ишке киргизүү маселелерине арналды.

Иш-чарага мамлекеттик органдардын, эл аралык уюмдардын, финансы институттарынын, бизнес-коомчулуктун жана эксперттик чөйрөнүн өкүлдөрү катышып, экономикалык багыттарды, анын ичинде энергетика, айыл чарба, чакан жана орто бизнес, туризм жана креативдүү индустриялар тармагындагы мүмкүнчүлүктөрдү талкуулашты.

Медербек Туманов Чаткал району экотуризмдин алдыңкы борбору, экологиялык таза айыл чарба продукциясын жеткирүүчү жана жашыл энергетика тармагында лидер болууга потенциалдуу экенин белгиледи. Ал эми район акими Алтынбек Сенирбаев кубаттуулугу 160 МВт болгон жаңы гидроэлектростанция курулуп жатканын айтып, аймактын туруктуу өнүгүүсүнө болгон пландарды билдирди.

Форумдун негизги жыйынтыгы – улуттук лейбл-пилотту ишке киргизүү жана климаттык каржылоо инструменттерин колдонуу боюнча консолидацияланган сунуштар камтылган резолюциянын долбоорунун макулдашылышы болду. Бул Чаткал районун өнүктүрүүдө мамлекеттин жана эл аралык өнөктөштөрдүн кызыгуусун тастыктады.