Кыргызстандын соода жүгүртүүсү 12,8 млрд долларга чейин кыскарып, экспорт дээрлик 40%га төмөндөдү
2025-жылдын январь–октябрь айларында Кыргызстандын тышкы соодасынын көлөмү 12 миллиард 803,5 млн долларды түзүп, 2024-жылдын ушул эле мезгилине салыштырмалуу 9,6%га азайган. Ал эми январь–сентябрь айларынын жыйынтыгы боюнча төмөндөө 8,3%ды түзгөнун Улуттук статистика комитети билдирди.
Маалыматка ылайык, тышкы сооданын кыскарышы экспорттун да, импорттун да азайышына байланыштуу болду. Тактап айтканда:
- Экспорт 38,2%га төмөндөп, 2 миллиард 409,3 млн долларды түздү;
- Импорт 0,3%га кыскарып, 10 миллиард 394,2 млн долларды түздү.
Кыргызстан мурдагыдай эле импортко көз каранды өлкө бойдон калып жатат. Өлкөгө сырттан кирген товарлар жалпы товар жүгүртүүнүн 81,2%ын түзөт.
ЕАЭБ өлкөлөрү менен соода
Евразия экономикалык биримдигине (ЕАЭБ) мүчө өлкөлөр менен соодада абал салыштырмалуу жакшыраак. 2024-жылдын январь–октябрына салыштырмалуу соода көлөмү 1,1%га өскөн. Жалпысынан тогуз айдын ичинде Кыргызстан ЕАЭБ өлкөлөрү менен 4 миллиард 523,4 миллион долларлык соода жүргүзгөн.
Ошол эле учурда, экспорт дагы эле негизги көйгөй бойдон калууда. Ал 2024-жылга салыштырмалуу 36,1%га төмөндөп, болгону 933,1 миллион долларды түздү. Ал эми импорт, тескерисинче, 19,2%га өсүп, 3 миллиард 590,3 миллион долларга жеткен.
ЕАЭБ өлкөлөрүнүн ичинен Кыргызстандын соодасында Россия негизги орунду ээлеп, үлүшү 64,3%ды, ал эми Казакстан 33,2%ды түздү.
Жалпы Кыргызстандын товар жүгүртүүсүндө:
- ЕАЭБ өлкөлөрү менен соода — 35,3%,
- экспортто — 38,7%,
- импортто — 34,5% үлүшкө ээ болду.
