РКӨФ 2026-жылы КРнын экономикасын 200 млн $ менен каржылайт

Россия-Кыргыз өнүктүрүү фондунун Кеңешинин XXI жыйыны болуп, анын жүрүшүндө Фонддун 2026-жылга карата инвестициялык бюджети бекитилди. Ага ылайык, жаңы долбоорлорду каржылоонун көлөмү 200 млн АКШ долларынан ашмакчы болду.

РКӨФ Башкармалыгынын төрагасы Артём Новиков белгилегендей, бул рекорддук көрсөткүч, Фонддун Кыргызстандын экономикасынын өсүшүн колдоодогу артыкчылыктуу ролу болуп саналат.

Талкуунун жүрүшүндө Кеңеш келерки жылы ишке ашырыла баштай турган бир нече ири долбоорлорду жактырды.

“100 млн АКШ долларынан ашкан суммага бир катар маанилүү жана ири долбоорлор бекитилди. Алардын ичинде Кыргызстандын экономикасы үчүн маанилүү болгон чийки заттарды жана материалдарды Россия Федерациясынан жеткирип келүүгө байланышкан долбоорлор да бар”, — деп белгиледи РКӨФтүн башчысы.

Бекитилген демилгелерди ишке ашыруу өлкөнүн өндүрүштүк базасын бекемдөөгө, импортко болгон көз карандылыкты азайтууга жана ички кошумча нарк чынжырларын кеңейтүүгө мүмкүндүк берет.