Борбор Азияда 10 жылда суу ресурстары 12%га азайды

Калктын жан башына туура келген калыбына келүүчү суу ресурстарынын жеткиликтүүлүгү акыркы он жыл ичинде дагы 7%га кыскарганы БУУнун Азык-түлүк жана айыл чарба уюму (FAO) жарыялаган AQUASTAT маалымат базасынын жаңы сереп баяндамасында айтылат.

ФАОнун маалыматына ылайык, Борбордук Азия 2015-жылдан бери калктын жан башына туура келген жеткиликтүү кайра жаңылануучу суу ресурстарынын 12%ын жоготкон, бул дүйнөдөгү эң жогорку көрсөткүчтөрдүн бири болуп саналат.

FAO адистери суу тартыштыгынын деңгээлин өлчөө үчүн "суу стресси"  деген көрсөткүчтү колдонушат. Бул көрсөткүч суу керектелүүсүнүн анын коруна (запасына) карата пайыздык үлүшүн чагылдырат. Борбордук Азия суу пайдалануусунун түзүмүнөн улам суу стрессине туш болуп жатат. Сууну сарптоонун 82%ы айыл чарбасына туура келет.

Ага карабай аймакта суу ресурстарын башкарууда оң тенденциялар да байкалып жатканын FAO кошумчалайт. Тактап айтканда, жер астындагы сууну жалпы алуу көлөмү 9%га кыскарган (2015-жылдагы 123 млн куб метрден 2022-жылы 112 млн куб метрге чейин), ал эми суу стрессинин деңгээли 76,8%дан 70,2%га чейин төмөндөгөн. Бул 8,6%дык азаюуну түзөт.

Суу стрессинин жогорку деңгээли жыл сайын алынган суунун көлөмү табигый жол менен толукталуучу көлөмгө жакындап же андан ашып кеткенин билдирет. Бул суу экосистемаларынын жана экономиканын туруктуулугуна коркунуч жаратат.