Экономика министрлигинде бир катар аудиттик кемчиликтер аныкталды
Эсептөө палатасынын Кеңеши Экономика жана коммерция министрлигинде жана анын карамагындагы мекемелерде 2022–2024-жылдар аралыгында жүргүзүлгөн шайкештик аудитинин жыйынтыктарын карады. Бул тууралуу Эсептөө палатасынын маалымат кызматынан билдиришти.
Аудит натыйжалуу бюджеттик тартип, ведомстволордун функцияларын так аткаруу жана министрликтин көзөмөлүн камсыз кылуу жагында системалуу кемчиликтер бар экенин көрсөткөн. Анда бюджеттик пландоо, командировкалар, мамлекеттик сатып алуулар жана тышкы жардам долбоорлорун башкаруу жагында белгилүү түрдө мүчүлүштүктөр табылды.
Тышкы жардам долбоорлорунун айрымдары ыйгарым укуктуу органдар менен макулдашуусуз, корутундуну ала албай ишке киргизилгени аныкталып, жалпы суммасы 10 млрд сомдон ашкан долбоорлордун мониторингден четте калышы мамлекеттин көзөмөл жүргүзүүсүнө тоскоолдук жаратаары белгиленди.
Аудит ошондой эле “Кыргыз Экспорт” мекемеси менен чет өлкөлөрдөгү соода өкүлчүлүктөрүнүнфункциялары кайталанып, ролдор так бөлүштүрүлбөгөнүн аныктады. Ошондой эле экспорттук келишимдерди тастыктоо процессинде документтер толук сунушталбай, комиссиялык төлөмдөр алынбагандыгы келечектеги келишимдердин ишенимдүүлүгүнө коркунуч жаратат.
Аккредитация жана стандартташтыруу тармагында каржылык башкарууда мыйзам бузуулар, регламенттердин аткарылбаганы жана ички контролдун жетишсиздиги катталды, бул улуттук тутумга болгон ишенимге терс таасир тийгизет.
Мындан тышкары экспорт иш-чараларында натыйжалуулуктун төмөндүгү, документтештирүүнүн жетишсиздиги жана мониторингдин жоктугу белгиленди.
Туризмди өнүктүрүүнү колдоо фонду боюнча аудит да ири бюджеттик каражаттар талаптагыдай көзөмөлгө алынбай, мониторингсиз пайдаланылган учурларды көрсөткөн.
Эсептөө палатасы сунуш кылган негизги чаралардын катарында бюджеттик тартипти чыңдоо, ички контролду жакшыртуу, функциялардын кайталанышын жоюу жана мамлекеттик каражаттарды ачык-айкын пайдаланууну камсыз кылуу бар.
