Кыргызстан менен Авганистан соода-экономикалык кызматташуунун келечегин талкуулашты
2025-жылдын 17-декабрында Кабул шаарында Экономика министри Бакыт Сыдыков Авганистандын административдик жана социалдык маселелер боюнча вице-премьер-министри Абдул Салам Ханафи менен жолугушту.
Бул тууралуу Экономика министрлигинин басма сөз кызматынан карбалашты. Билдирүүгө караганда, сүйлөшүүлөрдүн жүрүшүндө тараптар эки тараптуу соода-экономикалык жана инвестициялык кызматташуунун абалын жана келечегин талкууга алынган.
Кыргыз тарап соода жана инвестиция, мамлекеттик жана финансылык кызмат көрсөтүүлөрдү санариптештирүү, ошондой эле банктык кызматташууну кеңейтүү багыттарында өз ара аракеттенүүнү өнүктүрүү боюнча конкреттүү сунуштарды билдирди.
Мындан сырткары, иш сапардын алкагында Экономика жана коммерция министрлигине караштуу «Кыргыз Экспорт» борбору жана Авганистандын Соода-инвестициялык палатасы тарабынан уюштурулган кыргыз-ооган бизнес-форуму болуп өттү.
Форумдун жүрүшүндө «Кыргыз Экспорт» борборунун директору Урмат Такиров ооган бизнес-коомчулугуна Кыргызстандын экспорттук мүмкүнчүлүктөрүн тааныштырды. Иш-чаранын жыйынтыгында товарларды жеткирүү жана кызмат көрсөтүү боюнча жалпы суммасы 157 млн АКШ долларын түзгөн 11 ниет келишимине кол коюлду. Бул келишимдер телекоммуникациялык жабдуулар, цемент, бут кийим, дары-дармектер, бал, логистикалык кызматтар жана айыл чарба продукциясы сыяктуу багыттарды камтыйт.
Бизнес-форумга эки өлкөнүн мамлекеттик органдарынын жана бизнес чөйрөлөрүнүн 100дөн ашуун өкүлү катышты.
