Англия Өзбекстандын 4, Кыргызстандын 1 компанияларын антироссиялык санкциялар тизмесине кошту
Улуу Британия антироссиялык санкциялар тизмесин жаңылап, ага Өзбекстандан төрт компанияны жана Кыргызстандагы бир компанияны кошту. Бул ишканалар Россия менен экономикалык кызматташтык кылган деп шектелүүдө. Ушуга байланыштуу Лондон 18-декабрдан тартып аларга каршы активдерди тоңдурууга кошумча каржылык чектөөлөрдү киргизери Улуу Британиянын Казына министрлигинин документтеринде айтылат.
Өзбекстанда катталган жана санкциялык тизмеге киргизилген компаниялар:
- Фергана химиялык заводу;
- "Gelion Business Trade" ЖЧКсы (Ташкент);
- "Chemistry International" СП ЖЧКсы (Навои);
- "Raw Materials Cellulose" ЖЧКсы (Жизак).
Британ бийлигинин маалыматына ылайык, бул уюмдардын баары Россияга товарларды же технологияларды жеткирген деп шектелүүдө. Ал товарлар же технологиялар РФ тарабынан Украина аймагында жүргүзүлүп жаткан атайын аскердик операцияда кандайдыр бир деңгээлде колдонулган болушу мүмкүн. Башка кошумча маалыматтар келтирилген эмес.
Жаңыртылган санкциялар тизмесине Бишкекте катталган "Кифико" аттуу компания да кирди. Лондон бул ЖЧКны Россия өкмөтүн колдоду деп айыптап, аны РФ бийлиги үчүн стратегиялык мааниге ээ болгон каржы секторунда бизнес жүргүзгөн деп көрсөттү. Маалыматка ылайык, "Кифико" мурда Улуу Британия гана эмес, АКШ жана Европа Биримдиги тарабынан да санкция салынган A7 компаниясы менен байланышта экени айтылат.
Борбор Азия өлкөлөрүндөгү ишканалардан тышкары, жаңыртылган санкциялар тизмесине Россиядан жана Бириккен Араб Эмираттарынан да уюмдар киргизилди.
