Бажы кызматы контрабандага каршы күрөшүүдөн бюджетке 1,5 млрд сом түшүрдү
2025-жылы Мамлекеттик бажы кызматындагы Контрабандага каршы күрөшүү башкы башкармалыгы өз ишинде жогорку натыйжалуулукту көрсөттү. Бул тууралуу Бажы кызматынан маалымдашты.
Январь-декабрь айларында бажы мыйзамдарын бузуу боюнча жалпы 9 604 факт аныкталып, анын 9 100ү административдик укук бузуулар, ал эми 504ү кылмыш фактылары болуп, материалдар Бажынын иликтөө башкармалыгына өткөрүлдү.
Бул иштердин жыйынтыгы менен мамлекетке чоң көлөмдө каражаттар кайтарылып, кошумча кирешелер пайда болду. Материалдык зыяндын орду толтурулган сумма 1,1 млрд сомдон ашып, мамлекеттин кирешесине транспорт каражаттары жана башка мүлк, анын ичинде кымбат баалуу металлдар 326 млн сомдон ашык баада берилди.
Жыйынтыгында бюджетке кошумча түшкөн жалпы сумма 1,5 млрд сомду түзүп, бул көрсөткүч 2024-жылга салыштырмалуу 603 млн сомго көп болду. Бул Контрабандага каршы күрөшүү башкармалыгынын тарыхында эң жогорку натыйжа болуп эсептелет.
Учурда башкы башкармалык мыйзам бузууну алдын алуу, товарларды мыйзамсыз ташуунун тобокелдиктерин азайтуу жана Кыргыз Республикасынын экономикалык кызыкчылыктарын коргоо боюнча ишмердүүлүгүн улантууда.
