“Кыргызфармациянын” аудитинде бюджеттик жана эсептик кемчиликтер аныкталды
Эсептөө палатасы 2024-жылдын 1-январынан 31-декабрына чейинки мезгилде Саламаттык сактоо министрлигине караштуу “Кыргызфармация” ишканасынын ишмердүүлүгүнө аудит жүргүздү. Бул тууралуу ведомствонун маалымат кызматынан билдиришти.
Ишкана мамлекеттик медициналык уюмдарды жана калкты жеткиликтүү баада дары-дармек жана медициналык буюмдар менен камсыз кылуу максатында иштейт. Анын 2024-жылга карата бюджети 4,99 млрд сом кирешежана 4,84 млрд сом чыгаша менен бекитилип, жыл жыйынтыгында 5,63 млрд сом көлөмүндө аткарылган.
Аудиттин жыйынтыгында сатып алуу, сактоо жана эсепке алуу процессинде мыйзам талаптарына толук шайкеш келбеген учурлар, ички контролдун жетишсиздиги жана финансылык башкарууда кемчиликтер аныкталды. Ошондой эле бухгалтердик эсеп менен кампа эсептеринин айырмачылыктары, дары-дармектердин жарактуулук мөөнөтү өтүп кетиши жана “Эл Аман” филиалы боюнча кампа жана эмгек акы башкарууда кемчиликтер белгиленди.
Аудиттин сунуштары бюджеттик тартипти чыңдоого, сатып алууларды жана эсепке алуу процесстерин жакшыртууга, ошондой эле аныкталган кемчиликтерди жоюуга багытталган. Аныкталган айрым суммалар бюджетке кайтарылып, калыбына келтирилет. Бул чаралар “Кыргызфармациянын” натыйжалуулугун жогорулатууга жана дары-дармек менен үзгүлтүксүз камсыздоону жакшыртууга жардам берет.
