Кыргызстан бир жылда Түштүк Кореядан 2,6 млрд долларга автоунаа импорттоду
Кыргызстан Түштүк Кореядан колдонулган автоунааларды эң көп сатып алган өлкө болгонун Yonhap агенттиги билдирди.
Акыркы бир жылда Түштүк Кореядан колдонулган автоунаалар рыногу кескин жанданып, жеткирүүлөрдүн географиясы Евразия өлкөлөрүнө карай олуттуу өзгөргөн. Буга чейин экспорттун негизги багыттарынын катарына кирбеген мамлекеттер колдонулган автоунаалардын ири сатып алуучуларына айланды. Бул маалымат Кореянын Соода, өнөр жай жана ресурстар министрлигинин жана Автоөнөр жай институтунун маалыматтарына таянып берилген.
Ошондой эле январь–октябрь айларында Кыргызстан, Россия жана Казакстан Түштүк Кореядан колдонулган автоунааларды импорттоочу негизги өлкөлөр болгону белгиленет.
Берилген маалыматтарга ылайык, аталган мезгилде Кыргызстан 2,6 млрд долларга автоунаа импорттогон. Россия — 909 млн долларга, ал эми Казакстан — 664 млн долларга колдонулган автоунаа сатып алган.
Агенттиктин маалыматына караганда, Кыргызстанга кымбат автоунаалар да алып келинип кайра Россияга сатылат.
Жалпысынан алганда, январь–ноябрь айларында Түштүк Кореядан колдонулган автоунаалардын экспорту 8,4 млрд доларды түзгөн. Бул өткөн жылдын ушул эле мезгилине салыштырмалуу 80%га көп (2024-жылы — 4,6 млрд доллар).
