Салык кызматы 11 айда 19,4 млрд сомдон ашык акциз салыгын чогултту
Үстүбүздөгү жылдын январь–ноябрь айларында Мамлекеттик салык кызматы өлкөдө өндүрүлгөн жана ЕАЭБге мүчө мамлекеттерден алынып келинген товарлардан бюджетке 19 млрд 493,06 млн сом акциз салыгынын түшүүсүн камсыз кылды.
Салык кызматынын маалыматына ылайык, акциз салыгын чогултуу көрсөткүчтөрү 2024-жылдын ушул мезгилине салыштырмалуу 3 млрд 1,7 млн сомго же 17,3%га өскөн.
Кыргыз Республикасында өндүрүлгөн акциздик продукциядан 2025-жылдын январь–ноябрь айларында 4 млрд 826,3 млн сом акциз салыгы түшкөн. Анын ичинде алкоголдук продукциядан 3 млрд 448,3 млн сом, алкоголсуз суусундуктардан 1 млрд 297,0 млн сом, мунайзаттан 70,0 млн сом жана тамеки продукциясынан 8,2 млн сом чогултулган.
Ал эми ЕАЭБге мүчө мамлекеттерден алынып келинген акциздик продукциялардан 14 млрд 666,8 млн сом салык жыйналган. Анын ичинде тамеки продукциясынан 9 млрд 111,7 млн сом, мунайзаттан 3 млрд 670,9 млн сом, алкоголдук продукциядан 653,7 млн сом жана алкоголсуз суусундуктардан 749,2 млн сом түшкөн.
Эске салсак, 2021-жылдын 1-июлунан тартып Кыргызстанда аймагында алкоголдук жана тамеки продукцияларын идентификациялоо каражаттары менен милдеттүү түрдө маркалоо киргизилген. Учурда "Товарларды маркалоо" маалыматтык системасында тамеки продукциясынын 12 импорттоочусу, 34 өндүрүүчүсү жана алкоголдук продукциянын 96 импорттоочусу катталып, маркалоо коддорун алышат.
2025-жылдын 11 айында жалпы 223,7 млн маркалоо коду берилген. Анын ичинен тамеки продукциясына 157,2 млн код, алкоголдук продукцияга 42,6 млн код, жеңил өнөр жай продукциясына 23,7 млн код, бут кийимге 167,9 миң код жана парфюмерияга 3,3 миң код тапшырылган.
