Президент балык тоютун өндүрүүчү заводдун иши менен таанышты

Президент Садыр Жапаров бүгүн Чүй облусунда жайгашкан "Тянь-Шань форель" ЖЧКсына таандык балык тоютун өндүрүүчү заводдун иш шарттары менен таанышты.

Мамлекет башчысына маалымдалгандай, ишкананын курулушуна 5 миллион доллар жумшалып, завод болжол менен 7 гектар жерде курулган.

Маалыматта айтылгандай, завод сегиз айдын ичинде курулуп бүткөрүлгөн. Толук кубаттуулукта иштей баштаганда суткасына 100–130 тонна продукция өндүрө алат. Ишкананын ишке кириши менен 100дөн 120га чейин туруктуу жумуш орундары түзүлөт. Заводдун жетекчиси Илгиз Сарылдык уулу бул көрсөткүч республикадагы ички муктаждыктарды толук камсыздоого жана экспорттук багытты өнүктүрүүгө шарт түзөрүн белгиледи.

Өлкө башчы заводдун жетекчилигине сапат стандарттарын катуу жана үзгүлтүксүз сактоо зарылдыгына өзгөчө көңүл буруп, бул талап балык чарба тармагынын туруктуу өнүгүшүнүн жана ата мекендик продукциянын атаандаштыкка жөндөмдүүлүгүнүн негизги фактору экенин баса белгиледи.