Кыргызстанда өсүмдүк майы менен өзүн өзү камсыздоо 56,5%га жетти
Кыргызстанда өсүмдүк майын импорттоого болгон көз карандылык ички өндүрүштүн өсүшү жана кайра иштетүүнүн кеңейиши эсебинен азайып жатат, — деп билдирди Айыл чарба министрлигинин басма сөз кызматы.
2024-жылдын жыйынтыгы боюнча рынокту ички өндүрүштүн эсебинен камсыз кылуу деңгээли 2022-жылдагы 20,2%дан 50%га чейин өстү. Ал эми 2025-жылдын 11 айында өсүмдүк майын өндүрүү көлөмү болжол менен 18,5 миң тоннаны түзүп, өзүн-өзү камсыз кылуу деңгээли 56,5%га жетти.
2025-жылы республикада майлуу өсүмдүктөрдү кайра иштетүү боюнча беш жаңы ишкана ачылды: бирөө Ысык-Көл облусунда, экөө Нарын облусунда, ошондой эле Талас жана Чүй облустарында бирден. Улуттук статистика комитетинин маалыматына ылайык, өлкөдө 9 ири жана 136 чакан кайра иштетүүчү ишкана катталган.
Кайра иштетүү кубаттуулуктарынын кеңейиши импорттун кыскарышына өбөлгө түзүп, ички өндүрүштү мындан ары өнүктүрүү үчүн негиз түзүүдө. Ошол эле учурда Айыл чарба министрлиги майлуу өсүмдүктөрдүн жогорку түшүмдүү сортторун киргизүү боюнча иштерди жүргүзүүдө. АКШдан, Россиядан, Казакстандан жана Түркиядан алынып келинген сорттор сыноодон өткөрүлүгөн.
Колдонууга уруксат берилген сорттордун мамлекеттик реестрине өндүрүштө туруктуу көрсөткүчтөрдү көрсөткөн сафлордун келечектүү "Петрович" сорту киргизилди.
