Англияда "зыяндуу тамактарды" жарнамалоону кыскартуу 2 млрд фунт стерлингди үнөмдөйт

Англияда зыяндуу тамактарды интернет мейкиндигинде жарнамалоого тыюу салуу тартиби киргизилди. The Guardian гезитинин маалыматына ылайык, чектөөлөр курамында кант, май жана туз көп болгон 13 категориядагы азык-түлүккө тиешелүү.

Алардын катарына кант кошулган суусундуктар (анын ичинде йогурт сыяктуу айрым сүт азыктары), чипсылар, туздуу крекерлер жана печеньелер, кант кошулган жүгөрү талканы жана башка эртең мененки "жарым-жартылай даяр" тамактар, попкорн, шоколад, сагыз, балмуздак, кант кошулуп бышырылган азыктар, пицца жана тоңдурулган даяр тамактар кирет.

Британ өкмөтү балдар арасындагы семирүүнүн масштабын көрсөткөн статистиканы келтирет. Мисалы, башталгыч мектепке киргенде балдардын 22,1%ы ашыкча салмакка же семирүүгө дуушар болот. Ал эми мектепти аяктаган учурда бул көрсөткүч 35,8%га чейин өсөт. Ошондой эле 5 жаштан 9 жашка чейинки балдардын дарыгерге кайрылуусунун негизги себеби тиш кариеси экени белгиленет.

Бийлик изилдөөлөрдүн жыйынтыгына таянып, жарнама балдардын эмне жана качан тамак жешине таасир этерин, алардын даам тандоосун эрте курактан калыптандырып, семирүү жана ага байланыштуу оорулардын коркунучун жогорулатарын белгилейт. Өкмөттүн пикиринде, жаңы чаралар балдардын жылдык калория керектөөсүн 7,2 миллиард калорияга азайтып, семирүү менен жабыркаган балдардын санын 20 миңге кыскартууга жардам берет.

Узак мөөнөттүү келечекте бул жаңы эрежелер жарандардын жалпы саламаттыгынын жакшырышына байланыштуу болжол менен 2 миллиард фунт стерлинг үнөмдөөгө мүмкүнчүлүк берет.