Алтын менен күмүштүн баалары рекорддук чекке жетти
Алтын жана күмүш баалары тарыхый жогорку чекке жеткенин Риа Новости жазды.
Нью-Йорктагы Comex биржасында февраль айына карата алтын фьючерси 80,55 долларга же 1,79%га өсүп, 4581,45 долларга жетти. Сооданын ичинде баасы эң жогорку чекке – 4612,4 долларга чыккан.
Март айына күмүш фьючерси 5,27%га өсүп, 83,522 долларга сатылып, соода учурунда рекорддук деңгээл – 83,88 доллар байкалган.
Быйылкы өсүштү адистер доллардын алсыроосу жана инвестициялык суроо-талаптын көбөйүшү менен түшүндүрүшүүдө. Bloomberg агенттиги белгилегендей, өткөн жылы Дональд Трамптын администрациясынын Федералдык резерв системасын сындашы долларга ишеничти төмөндөтүп, бул алтын баасын көтөргөн негизги фактор болгон.
Ал эми күмүш рыногуна келсек, негизинен инвестициялык суроо-талаптын жогору болушунан быйыл анын жетишсиздиги сакталып калат деп күтүлөт.
