Алтын, күмүш, жез жана калайдын баалары тарыхый эң жогорку деңгээлге жетти
Алтын, күмүш, жез жана калайдын баалары дүйнөлүк чыңалуунун күчөшүнүн шартында жаңы тарыхый рекорддорду жаңылаганын Financial Times басылмасы кабарлады.
Маалыматка ылайык, баалардын өсүшүнө инвесторлордун АКШнын Иранга мүмкүн болгон аскердик кийлигишүүсүнө байланыштуу кооптонуулары, ошондой эле Федералдык резерв системасынын көз карандысыздыгы тууралуу суроолор таасир эткен.
Шаршемби күнү алтындын баасы 1,1%га өсүп, трой унциясы 4 миң 641 долларга жетти. Жыл башынан бери алтын 8%га кымбаттап, ал эми эки жылга жетпеген убакыт ичинде анын баасы эки эсеге көбөйдү. Күмүш болсо тарыхта биринчи жолу унциясы 90 доллардан ашып, 6%га өсүп, 92,24 долларга жетти.
Өнөр жай металлдарынын рыногунда да рекорддук көрсөткүчтөр катталды. Жездин тоннасынын баасы 13 миң 407 долларга, ал эми калайдын баасы 54 миң 760 долларга жетти.
Bank of Montreal банкынын аналитиги Хелен Амос белгилегендей, төрт металлдын бир убакта мындай ылдамдыкта кымбатташы акыркы 20 жылда болуп көрбөгөн көрүнүш. Анын айтымында, айрыкча күмүш, калай жана жездин бааларынын тез өсүшү институционалдык инвесторлорду тынчсыздандырууда.
