2025-жылы Кыргызстанда өнөр жай өндүрүшү дээрлик 800 млрд сомду түзгөн
Улуттук статистика комитетинин маалыматына ылайык, 2025-жылдын жыйынтыгы менен Кыргызстанда өнөр жай өндүрүшүнүн жалпы көлөмү 799 млрд 740 млн сомду түзүп, кайра иштетүү тармактарында олуттуу өсүш катталды.
Эң жогорку өсүү темпи фармацевтика тармагында байкалып, продукция чыгаруу көлөмү 2024-жылга салыштырмалуу 1,7 эсеге жогорулаган. Ошондой эле резина, пластмасса буюмдарын жана курулуш материалдарын өндүрүү тармагында 35,7%дык өсүш катталды.
Кайра иштетүү өнөр жайында төмөнкү багыттар боюнча оң динамика байкалууда:
- жыгач жана кагаз буюмдары, полиграфия – 30,5% өсүш;
- азык-түлүк продукциялары (ичимдиктерди кошкондо) жана тамеки буюмдары – 30,1% өсүш;
- химиялык продукция – 19,8% өсүш.
Пайдалуу кендерди казып алуу көлөмү 14,2%га өстү. Ошондой эле энергетика тармагында да өсүү байкалууда: электр энергиясы, газ жана буу менен камсыз кылуу көлөмү генерациялоо жана бөлүштүрүүнүн көбөйүшүнүн эсебинен 12%га жогорулады.
Мындан тышкары, суу менен камсыз кылуу жана калдыктарды тазалоо тармагында көрсөткүчтөр 21,4%га жакшырды.
Эске салсак, 2025-жылы Кыргызстандын ички дүң өнүмүнүн (ИДӨ) жалпы көлөмү 1,97 трлн сомго жетип, 11,1%га өскөн.
