Өзгөн районунда үч энергетикалык объект ишке берилди
Энергетика министри Таалайбек Ибраевдин Ош облусуна болгон иш сапарынын алкагында беш объект пайдаланууга берилди, алардын үчөө Өзгөн районунда жайгашкан.
Энергетика министрлигинин басма сөз кызматы билдиргендей, биринчи объект Куршаб айыл аймагында курулган. Аткарылган иштердин баасы 7 миллион 325 миң сомду түзөт.
Экинчи объект — кубаттуулугу 110/35/10 киловольт болгон "Кара-Шоро" подстанциясы. Бул объект боюнча аткарылган иштердин наркы 13 млн 462 миң сомду түздү. Подстанция заманбап электр жабдуулары менен камсыздалган.
Үчүнчү объект "Салам-Алик" тилкесинде энергетика кызматкерлеринин эмгек шарттарын жакшыртуу максатында курулган. Акыркы беш жылда энергетика тармагы бир топ жаңыланганы менен, бул дагы эле жетишсиз экендиги белгиленет. Бул объекттер энергетиктер үчүн гана эмес, эң оболу эл үчүн кызмат кылат, анткени алар калкты үзгүлтүксүз электр энергиясы менен камсыз кылуу максатында курулган.
