"Ала-Тоо Резортто" заманбап аркан жолу курулуп бүттү
"Ала-Тоо Резорт" туристтик комплексинде аркан жолунун курулушу аяктаганын долбоорду ишке ашыруучулар билдиришти.
Алардын маалыматына ылайык, учурда аркан жолу сыноо режиминде ишке киргизилип, тестирлөөдөн өтүп жатат. Инфраструктурада аркан жолун иштетүү жана башкаруу үчүн үч станция каралган. Объекттин узундугу 2 миң 280 метрди түзөт.
Аркан жолунун курамына үч станция кирет. Ар биринин электр энергиясын керектөөсү көтөрүлүү бийиктигине жараша болот. В1 станциясы 1 740 метрге чейинки бийиктикти тейлеп, саатына 358 киловатт электр энергиясын керектейт. Ал секундасына 5 метр ылдамдыкта кыймылдап, белгиленген чекитке жети мүнөттө жетет.
В2 станциясы андан жогору аймакты тейлейт жана саатына 654 киловатт электр энергиясын керектейт. Бул тилкеде аркан жолу 540 метр аралыкты тогуз мүнөттө басып өтөт.
Линияда эки түрдөгү кабиналар иштейт — ачык (креслолуу) жана жабык. Ар бир линиянын жалпы сыйымдуулугу 49 орунду түзөт. Аркан жолу аралаш ташуу системасы менен иштеп, жүргүнчүлөрдү ыңгайлуу жана тең салмактуу бөлүштүрүүгө мүмкүнчүлүк берет.
Белгиленгендей, жаңы аркан жол инфраструктурасы курорттун негизги объектилеринин бири болуп, туристтердин тоо аймактарына жетүүсүн кыйла жакшыртат. Долбоор коопсуздук жана комфорт боюнча заманбап талаптарды эске алуу менен ишке ашырылган.
