Кайталап мыйзам бузган импорттоочуларга жазалар кандай?

Мамлекеттик салык кызматы ЕАЭБге мүчө мамлекеттерден товарларды алып кирүүдө кайталап мыйзам бузуу болгон учурда чектөө чаралары колдонуларын салык төлөөчүлөргө эскерткенин мекеменин басма сөз кызматы билдирди.

Маалыматка ылайык, эгер календардык жыл ичинде ЕАЭБге мүчө өлкөлөрдүн аймагынан Кыргызстандын мамлекеттик чек арасы аркылуу товарларды жана транспорт каражаттарын алып өтүүгө байланыштуу үч жолу мыйзам бузуу аныкталып, ар бирине айып пул салуу тууралуу токтом чыгарылса, анда Салык кызматы төмөнкү чараларды көрүүгө укуктуу:

• мурда берилген "ЕАЭБ өлкөлөрүнөн товарларды импорттоо максатында" деген белгиси бар салыктык каттоо маалымдамасын жокко чыгаруу;
• аталган маалымдаманы алуу үчүн автоматташтырылган системага жеткиликтүүлүктү бир жылга жабуу.

Бул чектөөлөр ар бир мыйзам бузуу боюнча айып пул салуу тууралуу токтом мыйзамдуу күчүнө кирген учурда гана колдонулат.

Товарларды алып кирүүдө талаптарды бузгандыгы үчүн административдик айып пул салынат:

• жеке жактар үчүн — 20 000 сом;
• юридикалык жактар үчүн — 65 000 сом.

Кайталап мыйзам бузуу болгон учурда:

• жеке жактар үчүн — 40 000 сом;
• юридикалык жактар үчүн — 100 000 сом.

Мындан тышкары, товарлар жана транспорт каражаттары конфискацияланышы мүмкүн.