Кыргызстанда медициналык китепчелер электрондук китепчелерге өтөт
Саламаттык сактоо министрлиги Министрлер кабинетинин "2011-жылдын 16-майындагы №225 токтомуна өзгөртүүлөрдү жана толуктоолорду киргизүү жөнүндө" токтом долбоорун коомдук талкууга сунуштады.
Долбоорго ылайык, кагаз түрүндөгү медициналык китепчелерден электрондук медициналык китепчелерге өтүү, ошондой эле декреттелген контингент үчүн медициналык кароолорду уюштуруу жана андан өтүү процесстерин санариптештирүү каралган.
Долбоорду ишке ашыруу мамлекеттик маалыматтык системаларды колдонуу жана "Түндүк" платформасы аркылуу интеграциялоо менен санариптик чечимдерди киргизүүнү камтыйт.
Министрликтин маалыматына ылайык, медициналык кароолорду санариптештирүү жана электрондук медициналык китепчелерди киргизүү төмөнкү мүмкүнчүлүктөрдү берет:
- медициналык мекемелерге баруу санын жана убакытты кыскартат;
- медициналык кароодон өтүү жана китепче алуу процессин жөнөкөйлөтөт;
- текшерүүлөрдүн жыйынтыктарына жеке кабинет жана мобилдик тиркемелер аркылуу электрондук форматта жеткиликтүүлүктү камсыздайт.
