Беларусь Кыргызстандан эмгек мигранттарын тартууга кызыкдар
Беларусь Кыргызстандан эмгек мигранттарын активдүү тартууну пландап жатканын республиканын ички иштер министринин орун басары Геннадий Казакевич билдирди.
Анын айтымында, 2025–2027-жылдарга карата эки мамлекеттин ортосундагы мамилелерди өнүктүрүү боюнча жол картасы башка багыттар менен катар Беларус экономикасына эмгек мигранттарын тартууну да камтыйт.
"Азыркы учурда жалпы республикалык бош жумуш орундар банкынын маалыматына ылайык, Беларуска 147 миңден ашуун жумушчу күчү керек. Кыргызстандан келген эмгек мигранттарынын агымы азырынча аз — биздин эсеп боюнча болгону 180 адам", — деди Геннадий Казакевич.
Ишкердик жана гуманитардык байланыштарды, Бишкек менен Минскинин ортосундагы аймактар аралык кызматташууну өнүктүрүү үчүн тараптар жарандардын өз ара өлкөлөрдө болуу тартиби тууралуу макулдашуу иштеп чыгышкан. Ушуга байланыштуу Беларус парламентинин төмөнкү палатасы болгон Өкүлдөр палатасы бул документти ратификациялоо жөнүндө мыйзамды кабыл алды.
Геннадий Казакевичтин пикиринде, бул эки өлкөнүн жарандарынын өз ара сапарларын мүмкүн болушунча ыңгайлуу кылат. Негизги жобо — жарандар убактылуу жүргөн жеринде 30 календардык күн ичинде тиешелүү органдарда каттоодон өтүү милдетинен бошотулат.
