Улуттук банктын активдеринин жалпы көлөмү 896,9 млрд сомго жетти
Улуттук банк 2026-жылдын 31-мартына карата финансылык абалы тууралуу отчетун жарыялады. Документке ылайык, жөнгө салуучунун активдеринин жалпы көлөмү 896,9 млрд сомду түзүп, 2025-жылга салыштырмалуу кыйла өстү.
Активдердин негизги бөлүгүн мурдагыдай эле монетардык алтын түзөт — 608,8 млрд сомдон ашык (бир жыл мурун 292,4 млрд сом болгон). Кассадагы, банктардагы жана каржы уюмдарындагы каражаттар да өсүп, 99,3 млрд сомго жетти.
Баалуу кагаздарга салынган инвестициялар туруктуу деңгээлде калды: калыс нарк боюнча болжол менен 51,9 млрд сом жана амортизацияланган нарк боюнча дээрлик 20 млрд сом. Ошондой эле негизги каражаттар менен материалдык эмес активдердин өсүшү белгиленген.
Улуттук банктын милдеттенмелеринин жалпы көлөмү 639,3 млрд сомду түздү.
Атап айтканда, жүгүртүүдөгү нак акчанын көлөмү 280,1 млрд сомго чейин өстү, банктар менен каржы уюмдарынын каражаттары 214,8 млрд сомго жетти. Министрлер кабинетинин каражаттары да олуттуу көбөйүп, 90 млрд сомдон ашты.
Жөнгө салуучунун капиталы 257,6 млрд сомго жетти. Отчеттук мезгилдеги таза пайда 25,9 млрд сомду түзүп, 2025-жылдагы көрсөткүчтөн үч эседен ашык жогору болду.
Улуттук банкта белгилешкендей, негизги көрсөткүчтөрдүн өсүшү резервдердин бекемделиши жана финансылык операциялардын көлөмүнүн көбөйүшү менен байланыштуу.
