Ун чыгаруучу компаниялар буудай импортуна нөлдүк КНСти киргизүүнү сунушташты
Экономика министрлиги буудай импортуна нөлдүк кошумча нарк салыгын (КНС) өз алдынча импорт кылган учурларда гана эмес, өлкөдөгү ири компаниялар аркылуу жеткирүүдө да колдонуу тууралуу токтомдун долбоору коомдук талкууга чыгарды.
Министрликтин маалыматына ылайык, 17-апрелде ведомствого Кыргызстандын ун тартуучу ишканалар ассоциациясы кайрылган. Анын өкүлдөрүнүн айтымында, тармак Россиядан буудай импорттоодо олуттуу кыйынчылыктарга туш болгон. "Казакстан Темир жолу" компаниясы Казакстандын аймагы аркылуу жүк ташуу боюнча өтүнмөлөрдүн болгону 18–20%ын гана макулдашууда. Бул республикадагы ун комбинаттарында чийки заттын запастарынын азайышына алып келген.
Учурда ун тартуучу ишканалар буудай жана ун боюнча белгилүү көлөмдө запастарды кармап турууга милдеттүү: чакан ишканалар — кеминде 700 тонна, ири ишканалар — кеминде 3 000 тонна. Орточо алганда, тармак эки айлык чийки зат запасына ээ.
Министрлик белгилегендей, азыркы учурда буудайды нөлдүк КНС менен импорттоо мүмкүнчүлүгү негизинен буудайды өз алдынча алып келген ири ишканаларга жана мамлекеттик материалдык резервдер фондуна гана берилген. Чакан ишканалар бул мүмкүнчүлүктөн дээрлик пайдалана албайт.
Ири ун өндүрүүчүлөр жетиштүү запастарга ээ болуп, буудайды чакан ишканаларга жеткирип берүүгө даяр. Бирок учурдагы Салык кодексинин нормалары мындай ички жеткирүүлөрдө нөлдүк КНСти колдонууга жол бербейт.
Жаңы өзгөртүүлөргө ылайык, буудай нөлдүк КНС менен түз импорттоочу-өндүрүүчүлөр тарабынан гана эмес, ири ун тартуучу ишканалар аркылуу да чакан ишканаларга жеткириле алат. Бул чаралар тармакты чийки зат менен туруктуу камсыздоого, ун тартыштыгын жана баанын өсүшүн алдын алууга, ошондой эле өлкөнүн азык-түлүк коопсуздугун камсыз кылууга багытталган.
Токтомдун долбоору демилгечилердин айтымында, ишканаларды чийки зат менен үзгүлтүксүз камсыздоого жана ички рынокто ун баасынын өсүү коркунучун азайтууга багытталган.
