Жер семирткичтердин кымбатташы кыргыз фермерлерине таасирин тийгизди
Бул тууралуу Суу ресурстары, айыл чарба жана кайра иштетүү өнөр жайы министрлигинин азык-түлүк коопсуздугу бөлүмүнүн башчысы Уран Чекирбаев "Биринчи радио" берүүсүнүн эфиринде билдирди.
Анын айтымында, Жакынкы Чыгыштагы кырдаалга байланыштуу минералдык жер семирткичтердин дүйнөлүк баасынын өсүшү Кыргызстанга да таасир эткен.
Чиновниктин сөзүнө караганда, Кыргызстан менен Өзбекстанга минералдык жер семирткичтерди жеткирген негизги камсыздоочулардын бири дүйнөлүк кризистин шартында Европага жеткирүүлөрдү көбөйтүп, өз продукциясынын баасын жогорулаткан.
"Мунун кесепетинен Кыргызстанга минералдык жер семирткичтердин импорту азайды. Белгилей кетчү нерсе, жер семирткичтердин жетишсиздигинен дүйнө жүзү боюнча өндүрүүчүлөр жабыркады, айрыкча АКШ менен Европада баалар өстү", — деди ал.
Чекирбаев бул жагдайда терс жактары менен катар оң жактарын да көрүүгө чакырып, минералдык жер семирткичтерди аз колдонуу органикалык айыл чарба продукциясын өстүрүүгө оң таасир тийгизерин кошумчалады.
"Быйыл Кыргызстанда фермерлер үчүн аба ырайы да жагымдуу болууда", — деп белгиледи ал.
