ЖКнын комитети Жалал-Абад эл аралык каржы борборун түзүү сунушун четке какты
Жогорку Кеңештин финансы, бюджет, ишкердик жана атаандаштыкты өнүктүрүү боюнча комитети бүгүн "Джалал-Абад эл аралык каржы борбору" эркин экономикалык аймагын (ЭЭА) түзүүнү караган мыйзам долбоорун четке какты.
Эске салсак, демилгечилердин айтымында, Жалал-Абаддагы ЭЭА (мыйзам долбоору шаар дагы "Жалал-Абад" деп аталып турган кезде демилгеленген) аймактын өнүгүшүн тездетүүгө шарт түзмөк. Анда финансылык, брокердик, камсыздандыруу, консультациялык жана башка кызматтарды көрсөткөн компаниялар иш алып бара алышмак.
Долбоорго ылайык, "Жалал-Абад" эл аралык каржы борбору шаардын административдик чегинде жайгашып, функционалдык (сервистик) типтеги ЭЭА болуп саналмак. Ал өзүнүн аймагына, бюджетине жана башкаруу органдарына ээ болмок.
Анын негизги милдеттери төмөнкүлөр:
- аймактын жана Кыргызстандын экономикасын эл аралык эмгек бөлүштүрүүгө натыйжалуу тартуу;
- чет элдик капиталды, технологияларды жана башкаруу тажрыйбасын тартуу үчүн ыңгайлуу шарттарды түзүү;
- мамлекеттик жана жеке менчик ишканалардын каражаттарын чет элдик капитал менен интеграциялоо аркылуу аймактын экономикалык потенциалын өнүктүрүү;
- кызмат көрсөтүүлөрдүн экспортун өнүктүрүү;
- Жалал-Абадды эл аралык ишкердик борбор катары өнүктүрүү;
- кошумча жумуш орундарын түзүү;
- заманбап сервистик технологияларды калыптандыруу;
- өлкөнүн фондулук рыногун эл аралык капитал рыноктору менен интеграциялоо;
- келечектүү стартап-долбоорлордун инвестициялык рынокторго жөнөкөйлөштүрүлгөн чыгышына шарт түзүү;
- каржылык жана кесиптик кызматтарды эл аралык мыкты стандарттардын негизинде өнүктүрүү;
- эл аралык деңгээлде каржы борбору катары таанылууга жетишүү.
Мыйзам долбоорун VII чакырылыштын депутаттары демилгелешкен: Мейкинбек Абдалиев, Шаирбек Ташиев, Камила Талиева, Кундузбек Сулайманов, Марлен Маматалиев, Шарапаткан Мажитова, Алишер Козуев, Гүлшаркан Култаева, Жылдыз Садырбаева, Чыңгыз Ажибаев, Сеидбек Зулпуев, Марат Мураталиев, Улугбек Ормонов, Миргүл Темирбаева, Жылдыз Таалайбек кызы, Чолпон Султанбекова, Таалайбек Сарыбашов, Бакыт Тентишев, Мурадил Сыдыков, Балбак Түлөбаев, Талайбек Масабиров, Нуржигит Кадырбеков, Азамат Исираилов, Тазабек Икрамов, Акылбек Түмөнбаев, Жалолидин Нурбаев, Бекмурза Эргешов, Илимбек Кубанычбеков.
