Россияда бензиндин баасы литрине 100 рублга чейин өсүшү мүмкүн
Экономикалык аналитик Денис Миролюбов "Абзац" басылмасына берген маегинде Россияда бензиндин баасы литрине 100 рублга чейин жетиши мүмкүн экенин билдирди. Анын айтымында, бир нече фактор бир убакта дал келсе, мындай сценарий орто мөөнөттүү келечекте мүмкүн.
"Азыркы динамиканы эске алганда, бензиндин литри 100 рубль болушу — жакынкы үч жыл ичинде толук мүмкүн болгон сценарий. Россияда күйүүчү майдын баасы дүйнөлүк мунай баасына дээрлик көз каранды эмес. Бизде бааны негизинен акциздер, салыктар, рублдин курсу жана жалпы бюджеттик саясат аныктайт", — деди эксперт.
Ал баанын өсүшүнө таасир эте турган бир нече факторду белгиледи: рублдин долларга карата 100дөн жогору алсырашуусу, мунай компанияларына салык жүгүн көбөйтүү жана өлкө ичинде күйүүчү май тартыштыгы. Анын айтымында, акыркы фактор буга чейин эле байкала баштаган.
Эксперт кескин баа өсүшү макроэкономикалык абал начарлабаса күтүлбөй турганын айтты. Ошол эле учурда, анын пикиринде, жыл аягына чейин бензиндин баасы литрине 70–75 рубль чегинде болушу мүмкүн.
Эске салсак, Татарстан аймагында акыркы маалыматтар боюнча 7–13-апрель аралыгында АИ-92, АИ-95 үлгүсүндөгү бензин жана дизель күйүүчү майы кымбаттаган. Тактап айтканда, АИ-92 баасы 62,06 рублдан 62,2 рублга, АИ-95 65,75тен 65,97 рублга чейин өскөн. Дизель майы 11 тыйынга кымбаттап, 72,67ден 72,78 рублга жеткен. Ал эми АИ-98 маркасындагы бензиндин баасы өзгөрүүсүз — 89,67 рубль бойдон калган.
