Бакыт Төрөбаев баштаган делегация Нарын, Ысык-Көл облустарын кыдырып жатат
Президенттин өзгөчө тапшырмалар боюнча атайын өкүлү Бакыт Төрөбаев баштаган делегациянын Нарын жана Ысык-Көл облусунда өткөрүлгөн иш сапары өлкөнүн аймактык өнүгүүсүн жаңы деңгээлге көтөрүүгө багытталган маанилүү кадамдардын бири болду.
Иш сапардын алкагында жергиликтүү бийлик өкүлдөрү тарабынан сунушталган демилгелер, инфраструктураны жакшыртуу, экологиялык коопсуздукту камсыз кылуу жана “жашыл экономиканы” өнүктүрүү багытындагы долбоорлор, региондун туруктуу өсүшүнө өбөлгө түзө турган негизги багыттар катары белгиленди.
Белгилей кетүүчү жагдай, Бакыт Төрөбаев президенттин тапшырмасына ылайык, өлкөнүн ар бир районунун экономикалык потенциалын талдап, натыйжалуу долбоорлорду түзүү жана ишке ашыруу боюнча так механизмдерди иштеп чыгуу аракетин көрүп жатат. Бул процессте долбоорлордун экономикалык негиздүүлүгү, экспорттук мүмкүнчүлүгү жана жаңы жумуш орундарын түзүү маселелери артыкчылык катары каралып жатат.
Буга чейин Ош, Жалал-Абад жана Чүй облустарында өткөрүлгөн жолугушууларда жергиликтүү ишкерлерге жана мамлекеттик кызматкерлерге инвестиция тартуу, долбоор жазуу жана аны ишке ашыруу боюнча практикалык багытта колдоо көрсөтүлгөн. Бул иштер аймактардын өз алдынча өнүгүү мүмкүнчүлүгүн күчөтүп, экономикалык активдүүлүктү арттырууга багытталган.
Жалпысынан өлкө боюнча 200гө жакын ири долбоорду ишке ашыруу планы коюлуп, энергетика, туризм, өндүрүш, билим берүү жана медицина тармактарына өзгөчө басым жасалып жатат.
