Бишкекте жеке мектептердеги жылдык окуу акысы 1,3 млн сомго жеткен
Кыргызстанда социалдык тармактарда жана ЖМКларда чыккан резонанстын фонунда Монополияга каршы кызмат Бишкектеги жеке мектептердеги окуу акысына мониторинг жүргүздү.
Мекеменин маалыматына ылайык, апрель айында борбордогу 104 жеке мектептин 45и текшерилди. Натыйжада айрым окуу жайларда жылдык төлөм 570 миң сомдон 1 млн 340 миң сомго чейин жетери аныкталды.
Башка жеке мектептерде баалар кыйла төмөн — жылына 40 миңден 150 миң сомго чейин.
Салыштыруу үчүн, жогорку окуу жайларда окуу арзаныраак. Кыргыз улуттук университетинде окуу акысы 43 миң сомдон башталса, Кыргыз-Россия Славян университетинде — 110 миң сомдон, ал эми Борбор Азиядагы Америка университетинде орточо 447 миң сомдон башталат.
Жалпысынан алганда, мекеменин маалыматы боюнча, Бишкектеги алдыңкы ЖОЖдордо окуу акысы орточо 107 миңден 152 миң сомго чейин болсо, жеке мектептерде — 313 миңден 580 миң сомго чейин.
Баалардын өсүшүнө байланыштуу Монополияга каршы орган Билим берүү министрлигине жана борбордун мэриясына сунуштарды жөнөттү. Алардын ичинде окуу акысын кармап туруу чаралары, жылдык төлөмү 200 миң сомдон жогору мектептерде чыгымдардын негиздүүлүгүн талдоо, ошондой эле баанын түзүлүшүн жана аны өзгөртүү эрежелерин милдеттүү түрдө ачыктоо сунуштары бар.
Ошондой эле билим берүүнүн жеткиликтүүлүгүн камсыз кылган жана окуучулар үчүн тең шарттарды түзгөн бирдиктүү эрежелерди иштеп чыгуу сунушталууда.
