Кыргызстан ЕБдин санкцияларды айланып өтүүгө каршы механизмине кабылды
Евробиримдикке мүчө өлкөлөрдүн элчилери 22-апрелде Брюсселде өткөн жыйында Россияга каршы жаңы санкциялар пакетин жактырышты. Бул пакет мурда Венгрия жана Словакия тарабынан “Дружба” мунай кууру аркылуу орус мунайын жеткирүү токтотулганына байланыштуу бөгөттөлүп келгенин Bloomberg агенттиги билдирди.
Элчилер Украина куурун оңдоо иштерин аяктаганын жана мунай жеткирүү кайра жанданганын билдиргенден кийин макулдашууга жетишти.
Документти кабыл алуу процедурасы бүгүн күндүн экинчи жарымында аяктайт деп күтүлүүдө. Андан кийин пакет расмий түрдө кабыл алынып, ЕБнин расмий журналында жарыяланат.
Башында Еврокомиссия 20-пакетти февраль айында кабыл алууну пландаган, бирок макулдашуу процесси узарып кеткенин Reuters жазды.
Жаңы санкциялар Россиянын энергетика тармагынан түшкөн кирешесин кыскартууга жана анын аскердик-өнөр жай комплексин чектөөгө багытталган. Атап айтканда, чаралар дрон өндүрүшүнө, “көмүскө флотко” тиешелүү болуп, ошондой эле Россиянын суюлтулган жаратылыш газына байланыштуу кызматтарга этап-этабы менен тыюу киргизилет.
Жаңы пакетте үчүнчү өлкөлөргө өзгөчө көңүл бурулган. Евробиримдик санкцияларды айланып өтүүгө каршы атайын механизмди биринчи жолу Кыргызстанга карата колдонууда.
Чечимге ылайык, Европадан Кыргызстанга кош максаттагы айрым товарларды жеткирүүгө түз тыюу салынды. Чектөөгө төмөнкүлөр кирди:
- жогорку тактыктагы металл иштетүүчү станоктор, анын ичинде сандык программалык башкаруусу (ЧПУ) бар жабдуулар;
- байланыш жабдуулары — модемдер, роутерлер, радиостанциялар жана башка маалымат берүүчү түзмөктөр.
Евробиримдик Кыргызстан бул товарларды Россияга кайра экспорттоонун туруктуу каналына айланды деп эсептейт жана Бишкек менен жүргүзүлгөн техникалык сүйлөшүүлөр чек ара көзөмөлүн күчөтүүгө алып келген жок деп билдирет.
Мындан тышкары, Кыргызстандагы айрым логистикалык компаниялар Евробиримдиктин транспорттук инфраструктурасына жетүү мүмкүнчүлүгүнөн ажыратылды.
