Айыл чарбанын дүң продукциясы 3 айда 47,9 млрд сом болду
Министр Эрлист Акунбеков министрликтин кызматкерлери менен жыйын өткөрүп, анда жылдын алгачкы үч айында айыл чарбанын дүң продукциясы 47 млрд 923 млн сомду түзгөнү белгиленди. Бул тууралуу Айыл чарба министрлигинин басма сөз кызматы билдирди.
Ведомствонун маалыматына ылайык, январь–март айларында айыл чарба продукциясынын ички дүң продукциясынын көлөмү 47 млрд 923 млн сомду түзүп, өткөн жылдын ушул мезгилине салыштырмалуу өсүү темпи 102,8%га жеткен.
Жалпы көлөмдүн негизги бөлүгүн мал чарбачылыгы — 98,0%, өсүмдүк өстүрүү — 1,5%, айыл чарба кызматтары — 0,3%, балык чарбачылыгы — 0,2%ды түздү.
Өткөн жылдын ушул мезгилине салыштырмалуу мал чарбачылыгында өсүү 2,8%ды, өсүмдүк өстүрүүдө — 1,2%ды түздү. Ири мүйүздүү малдын саны 1,8 млн башка жетип (өсүү 1,7%), кой-эчки — 6,3 млн (0,8%га көбөйдү), жылкы — 565,9 миң баш (2,3%га өстү).
Үй канаттууларынын саны 8,5 млн башка жетип, өткөн жылдын биринчи кварталына салыштырмалуу 11,9%га көбөйдү.
2026-жылдын 3 айында негизги продукциялардын өндүрүшү төмөнкүчө болду:
• эт — 100,3 миң тонна (+2,0%)
• сүт — 298,9 миң тонна (+2,5%)
• жумуртка — 201,9 млн даана (+24,6%)
Бир уйдан орточо саалган сүт 368 кг түзүп (өсүү 2,5%), тооктордун продуктивдүүлүгү 50 жумурткага жетип, 22%га жогорулады.
