Фрунзе айылында мал чарбачылыгы боюнча заманбап лаборатория ачылды
Сокулуктун Фрунзе айылында Кыргыз мал чарба жана жайыт илимий-изилдөө институтуна караштуу жаңыланган лаборатория ачылды.
Имаратты түп орду менен жаңылоону Түштүк Кореянын KOPIA борбору каржылык жактан колдоп, ал азыр заманбап илимий борборго айланды. Имарат толук капиталдык оңдоодон өтүп, изилдөөчүлөр үчүн ыңгайлуу шарттар түзүлдү.
Лабораторияны Дүйнөлүк банк каржылаган "Агрардык бизнестин атаандаштык борбору" заманбап жабдуулар менен камсыздады. Жайыт жана тоют багытындагы илимий-лабораториялык изилдөөлөр мал чарбаны өнүктүрүп, калктын жашоо деңгээлин жогорулатууда маанилүү.
Лабораторияда жайыттарды туура башкаруу жана тоют даярдоо боюнча илимий изилдөөлөр жүргүзүлөт. KOPIA борбору мал чарбасын өнүктүрүүгө багытталган - бодо малды жасалма уруктандыруу, үрөн, тоют даярдоо жана тоюттун заманбап системасын киргизүү боюнча ири долбоорлорду ишке ашырып келет.
Бул заманбап лабораториянын ачылышы — Кыргызстандын мал чарба жана агрардык илимин, айыл чарба тармагын модернизациялоодо маанилүү кадам экени белгиленди.
