Мугалимдердин айлыгын жогорулатууда бирдиктүү коэффициент киргизилди
2026-жылдын 1-апрелинен тартып бардык педагогикалык кызматкерлер үчүн бирдиктүү коэффициент колдонулуп жатканын маалымат жыйынында бюджеттик саясат, финансылык талдоо жана инфраструктура башкармалыгынын башчысы Акыйкат Баймуратова билдирди.
Буга чейин STEM багытындагы мугалимдер жана башталгыч класстардын мугалимдери үчүн өзүнчө коэффициент колдонулуп келген. Мындай ыкмага тарых мугалимдери каршы чыгып, министрлер кабинетинин башчысынан аны кайра карап чыгууну өтүнүшкөн.
Жалпы билим берүүчү мектептердин мугалимдерине квалификациялык категориясы үчүн ай сайын берилүүчү кошумча төлөмдөр төмөнкүдөй белгиленди:
- жогорку категория — 5 миң сом;
- биринчи категория — 3 миң сом;
- экинчи категория — 2 миң сом.
Ошондой эле эл аралык олимпиадалардын жеңүүчүлөрүн даярдаган мугалимдерге бир жолку кошумча төлөмдөр каралган:
- 1-орун үчүн — 500 миң сом,
- 2-орун үчүн — 300 миң сом,
- 3-орун үчүн — 200 миң сом.
Республикалык олимпиаданын жеңүүчүлөрүн даярдаган мугалимдерге окуу жылы ичинде ай сайын төлөмдөр берилет:
- 1-орун үчүн — 10 миң сом,
- 2-орун үчүн — 7 миң сом,
- 3-орун үчүн — 5 миң сом.
