Мугалимдерге кошумча төлөмдөр берилет, бирок эмгек өргүүнүн акчасы көбөйбөйт
Президенттик фонддон мугалимдердин айлыгына кошулуучу кошумча төлөм эсептөөгө киргизилбейт. Бул тууралуу маалымат жыйынында Билим берүү министрлигинин бюджеттик саясат жана финансылык талдоо башкармалыгынын башчысы Акыйкат Баймуратова билдирди.
Анын айтымында, кошумча төлөм мугалимдер үчүн 15 миң сомду, ал эми техникалык кызматкерлер үчүн 5 миң сомду түзөт. Бул төлөм бир гана ставка үчүн берилет: эгер мугалим 1,5 ставкада иштесе да, ага баары бир 15 миң сом төлөнөт. Кошумча акча окуу жылындагы иш мезгилинде гана — 10 ай бою берилет.
Эмгек өргүүсүнүн акчасын жана айлыкка байланыштуу башка жөлөкпулдарды эсептегенде бул кошумча төлөм эске алынбайт. Андан 10% өлчөмүндө киреше салыгы кармалат, бирок башка кармоолор жүргүзүлбөйт.
