Чакан жана орто бизнестин ИДПдагы үлүшү 51%га чейин өстү
Министрлер Кабинетинин төрагасы Адылбек Касымалиев чакан жана орто бизнести өнүктүрүү жана колдоо маселелерине арналган жыйын өткөрдү.
Иш-чарага мамлекеттик органдардын жана каржы институттарынын өкүлдөрү катышты. Ал белгилегендей, чакан жана орто бизнес өлкө экономикасынын негизги кыймылдаткычы болуп саналат.
"Акыркы 3 жылда чакан жана орто бизнестин ИДПдагы үлүшү 40%дан 51%га чейин өстү. Бул туруктуу экономикалык өсүштүн маанилүү көрсөткүчү. Айрыкча өнүктүрүү фонддору айыл жерлериндеги долбоорлорго көңүл бурушу керек. Долбоорлорду ишке ашырууну каалаган демилгелүү жарандарга тийиштүү колдоо көрсөтүлүшү зарыл", — деди ал.
Жыйындын катышуучуларына 2030-жылга чейин чакан жана орто бизнести колдоо жана өнүктүрүү программасынын долбоору сунушталып, "Ишкерлик субъекттерин пайыздык чендерди субсидиялоо аркылуу жеңилдетилген насыялоо" долбоорунун аткарылышы жана ишкерлерди колдоо боюнча көрүлгөн чаралар талкууланды.
Тийиштүү кызмат адамдарына программаны кыска мөөнөттө бекитүү тапшырмасы берилди. Программа ишкерлердин каржылоого жеткиликтүүлүгүн кеңейтүүгө багытталып, жеңилдетилген насыя продуктыларын жана кепилдик механизмдерин киргизүүнү карайт. Ошондой эле бизнес окутуу, акселерация жана коштоо системасын өнүктүрүү каралып, бул ишкерлердин жөндөмүн жогорулатууга жана долбоорлордун туруктуулугун камсыздоого мүмкүндүк берет.
