МинКаб Баткен облусундагы алтын жана сурьма кендерин иштетүү боюнча инвесторду өзгөрттү
Министрлер Кабинети "Кыргызполиметалл" ЖЧКсына "Нурлау" жана "Шаркыратма-Караканыш" сурьма жана алтын кендерин пайдалануу укуктарын ишке ашыруу боюнча LongShao Group менен кызматташууну карап чыгуу сунушун берди.
Тиешелүү №262-т буйрукка 2026-жылдын 18-апрелинде Министрлер Кабинетинин төрагасы Адылбек Касымалиев кол койгон.
Документ 100 пайыз мамлекеттик үлүшү бар чарба жүргүзүүчү субъект болгон "Кыргызполиметалл" ЖЧКсынын инвестициялык долбоорлорун ишке ашыруунун алкагында инвестиция тартуу максатында кабыл алынган.
Ушул эле буйрук менен Министрлер Кабинетинин 2026-жылдын 16-февралындагы №79-т мурдагы буйругу күчүн жоготту деп табылды. Анда "Кыргызполиметаллга" ушул эле кендер боюнча Thirty Five Investment Holding компаниясы менен кызматташуу сунушталган.
Ошентип, Министрлер Кабинети "Нурлау" жана "Шаркыратма-Караканыш" кендери боюнча потенциалдуу өнөктөштү өзгөрттү.
Thirty Five Investment Holding — Катардагы Доха шаарында жайгашкан үй-бүлөлүк инвестициялык топ болуп саналат. Анын негизги эл аралык борборлору Лондон, Сингапур, Гонконг жана Стамбул шаарларында жайгашкан.
Топтун негизги ишмердүүлүгү тоо-кен тармагына жана стратегиялык ресурстарга багытталган. Компания кобальт, никель, литий, тантал-ниобий сыяктуу глобалдык энергетикалык өтүүгө жана келечек индустрияларына негиз болгон маанилүү минералдар боюнча ири позицияларды түзөт.
Ачык булактарда LongShao Group тууралуу ишенимдүү коомдук маалымат табылган жок.
МинКаб 2026-жылдын 16-январындагы буйругуна ылайык, компанияга Баткен районунда жайгашкан "Нурлау" аянтында сурьма жана алтын казууга уруксат берилген.
Мындан тышкары, "Кыргызполиметалл" "Шаркаратма-Караканыш" участогунда геологиялык чалгындоо иштерин жүргүзүү укугуна ээ болгон.
Кыргыз Республикасынын Юстиция министрлигинин маалыматына ылайык, "Кыргызполиметалл" ЖЧКсынын жетекчиси Дөөлөталы Памиров, ал эми негиздөөчүсү — Мамлекеттик мүлктү башкаруу боюнча мамлекеттик агенттик.
2020-жылы "Нурлау" кенинде сурьманы чалгындоо лицензиясы "Баткен Тоо Кен" ЖЧКсына таандык болгон. Кен Ак-Сай жана Дарыин айыл аймактарында жайгашкан.
