ИӨБ 80 млн долларлык долбоорду жеңилдетилген насыя менен каржылайт
2026-жылдын 29-апрелинде Саламаттык сактоо министри Дамир Осмонов Ислам өнүктүрүү банкынын(ИӨБ) миссиясы менен жолугушуу өткөрдү. Делегацияны доктор Фарид Ахмед Хан жетектеди. Жолугушуунун жүрүшүндө тараптар саламаттык сактоо объекттерин модернизациялоо долбоорун ишке ашырууну талкуулашты.
Долбоордун болжолдуу каржылоо көлөмү жеңилдетилген насыя шарттары менен 80 млн долларды түзөт. Анын алкагында Ош шаарында онкологиялык борборду жана Нарын шаарында көп профилдүү оорукананы куруу каралып жатат.
Дамир Осмонов белгилегендей, Ош шаарында онкологиялык борбор куруу Саламаттык сактоо министрлигинин артыкчылыктуу милдеттеринин бири болуп саналат жана Президент Садыр Жапаровдун жеке көзөмөлүндө турат. Анын айтымында, министрлик долбоордун өз убагында ишке ашырылышы үчүн толук колдоо көрсөтөт. "Бул онкологиялык кызматты өнүктүрүү жана калк үчүн адистештирилген медициналык жардамдын жеткиликтүүлүгүн жогорулатуу багытындагы өтө маанилүү кадам", — деп баса белгиледи министр.
Ислам өнүктүрүү банкынын өкүлдөрү жакынкы убакта долбоордун техникалык-экономикалык негиздемесин иштеп чыгуу менен алектене турган консалтинг компаниясы ишин баштай турганын билдиришти. Тараптар сапаттуу долбоордук документтерди даярдоо саламаттык сактоо тармагындагы инфраструктуралык долбоорлорду ийгиликтүү ишке ашыруунун негизги баскычы экенин белгилешти.
Жолугушуунун жыйынтыгында тараптар мындан аркы кызматташууга жана Кыргызстандын саламаттык сактоо инфраструктурасын өнүктүрүүгө багытталган биргелешкен долбоорлорду ишке ашырууга өз ара кызыкдар экенин тастыкташты.
