Экспорттоочулардын сертификаттоо чыгымдарынын 50%ын кайтарып берүү сунушталууда
Экономика министрлиги ата мекендик өндүрүүчүлөр менен экспорттоочуларды колдоо максатында алардын продукцияны сертификаттоого, кайра сертификаттоого жана чет өлкөлүк лабораторияларда сыноодон өткөрүүгө кеткен чыгымдарынын бир бөлүгүн мамлекет тарабынан кайтарып берүүнү сунуштоодо.
Долбоорго ылайык, чыгымдардын бир бөлүгүн кайтаруу боюнча арыздарды кабыл алуу жана каражаттарды төлөп берүү үчүн жооптуу орган катары Экономика жана коммерция министрлигине караштуу "Кыргыз Экспорт" экспортту өнүктүрүү жана илгерилетүү борбору аныкталат. Бул механизм 2027-жылдын 1-январынан тартып иштей башташы пландалууда.
Долбоорго ылайык, шайкештик сертификатын алуу, кайра сертификаттоодон өтүү жана чет өлкөлөрдөгү аккредиттелген лабораторияларда продукцияны сыноо үчүн мамлекет чыгымдардын 50% кайтарып берүүнү, аны ишке ашыруу үчүн республикалык бюджеттен 50 млн сом каражат бөлүүнү сунуштап жатат. Анын ичинен 40 млн сом сертификаттоо жана кайра сертификаттоого, дагы 10 млн сом чет өлкөлүк лабораториялардагы сыноолорго багытталат.
Ошондой эле долбоордо чыгымдары жарым-жартылай кайтарылып берилүүчү эл аралык стандарттардын тизмесин бекитүү каралган. Арыздарды кароо үчүн атайын комиссия түзүлөт. Колдоо төмөнкүдөй продукцияларды изилдөөгө каралган:
- сүт азыктары;
- эт жана эт азыктары;
- балык;
- мөмө-жемиш жана жашылча;
- бал, жаңгак жана кургатылган жемиштер;
- кайра иштетилген тамак-аш продукциясы;
- экспортко багытталган башка продукциялар.
Экономикалык жактан алганда, демилге кыргызстандык өндүрүүчүлөрдүн эл аралык талаптарга жооп берген продукцияны өндүрүү жана аны тышкы рынокторго чыгаруу мүмкүнчүлүгүн кеңейтүүгө багытталган. Айрыкча айыл чарба жана тамак-аш продукциясын экспорттогон ишканалар үчүн сертификат алуу жана лабораториялык сыноолорго кеткен чыгымдардын жарымын кайтарып берүү экспортко чыгуудагы каржылык жүктү азайтышы күтүлөт.
Коомдук талкуудагы бул токтомдун долбоору боюнча сунуш-пикирлер 2026-жылдын 7-сентябрына чейин кабыл алынат.
