Быйыл Кыргызстанда кумшекердин тартыштыгы болбойт
2026-жылы Кыргызстанда "Кайыңды-Кант" жана "Кошой" ишканалары биргелешип 85–88 миң тоннага жакын кумшекер өндүрүүнү пландап жатат. Бул тууралуу бүгүн Чүй облусунун Панфилов райондук администрациясында аким, "Кайыңды-Кант" жана "Кошой" ААКнун өкүлдөрү жана жергиликтүү дыйкандар менен болгон жолугушууда маалымдалды.
Билдирүүгө караганда Кыргызстанга жылына 120 миң тоннага жакын кум шекер талап кылынат. Өлкөнүн бул ички керектөөсүнүн болжол менен 70%ын - "Кошой" жана "Кайыңды-Кант" заводдору камсыздай алат.
Ал эми кант кызылчасын өстүргөн дыйкандар үчүн быйыл түшүм жакшы болгону менен, аны жыйноо жана заводдорго жеткирүүдө чыгымдар көбөйүп жатканын белгиленүүдө.
Жайыл жана Панфилов райондорунан келген кызылча өстүргөн дыйкандардын айтымында, былтыр аба ырайынын ысык болушунан улам кант кызылчасынын түшүмү төмөн болгон. Быйыл түшүм кыйла жакшы болгону менен, аны жыйноо жана ташуу үчүн керектелүүчү күйүүчү-майлоочу майдын баасы дыйкандарга олуттуу чыгым алып келүүдө. Андыктан алар литри 105 сомго чейин жеткен күйүүчү майдын баасын төмөндөтүп берүүнү акимге сунушташты.
Кант кызылчасы сууну, эмгекти жана олуттуу чыгымды талап кылган айыл чарба өсүмдүгү болгондуктан, дыйкандар бул тармакты өнүктүрүүдө мамлекеттик колдоонун маанилүү экенин белгилешүүдө.
