Башкы прокуратура ишкердин 950 миң сомдон ашык салык карызын эсептен чыгарды
Башкы прокуратура салык органдары тарабынан ишкердик субъекттердин салыктык жүгүн азайтуу боюнча мыйзам талаптарынын аткарылбаганын аныктады. Маалыматка ылайык, «П» ЖЧКсынын 950 миң сомдон ашык салык карызы салыктык жүктү азайтуу боюнча мыйзамдарга ылайык эсептен чыгарылууга тийиш болгон. Бирок, иш жүзундө аткарылган эмес.
Башкы прокуратуранын маалымат кызматынын билдирүүсүнө караганда, компания бир нече жолу кайрылганына карабастан, карызды эсептен чыгаруу боюнча өз убагында чара көрүлбөй келген. Тескерисинче, салыктык администрациялоо маалыматтык системасы аркылуу компаниянын ашыкча төлөгөн каражаттарынан аталган карызды жабууга эсептөө жүргүзүлгөн.
Башкы прокуратуранын прокурордук чара көрүү актысы каралгандан кийин Бишкек шаарындагы тиешелүү салык органы 950 миң сомдон ашык салык карызын эсептен чыгарган.
Мындан тышкары, Мамлекеттик салык кызматы ашыкча төлөнгөн суммадан эсептен чыгарууга жатпаган салык карыздарын автоматтык түрдө жабууга жол бербөө боюнча чараларды көрдү.
Башкы прокуратура ишкердик субъекттердин укуктарын коргоо жана мамлекеттик органдардын мыйзам талаптарын так аткаруусун камсыз кылуу боюнча иштерди уланта бермекчи.
